Concello das Neves

Fátima e os seus dous fillos xa están vivindo nas Neves grazas á concesión dun alugueiro social

Facebook
Twitter
WhatsApp
Email

Fatima e os seus dous fillos de 7 e 11 anos volveron ás Neves e viven xa nunha casa propiedade do Concello, grazas á concesión dun alugueiro social.

A familia recibira un durísimo golpe cando o pasado 11 de decembro un incendio que se declarara hora na súa vivenda da rúa Entrecíns causara a morte do pai, de 48 anos de idade.

O Goberno local amosa a súa satisfacción porque estean de novo con nós e puxo á súa disposición todo o necesario para que comecen unha nova vida, dende agora, nesta casa da parroquia da Estación. A casa, de planta baixa, está totalmente equipada, dispón de mobiliario, todo tipo de electrodomésticos e calefacción. Conta cun pequeno xardín e está a carón dun parque infantil.

A Concellería de Servizos Sociais, que dirixe Pilar González Casas, facilitoulle á familia roupa de cama e equipamento e está á súa disposición para atender aquelas necesidades que puidesen ter. Así mesmo, axilizaron os trámites para que os dous menores puidesen reincorporarse aos seus cursos no CEIP Marquesa do Pazo da Mercé, ao que xa acudiron retomando as clases e onde atoparon todo o material escolar que precisaban.

Xosé Manuel Rodríguez amosa a súa «ledicia pola volta desta familia tan prezada» e reitera o seu orgullo pola «solidariedade das nosas veciñas e veciños ante unha desgraza tan terrible». Así mesmo, o alcalde salienta a «resposta do Concello dende o primeiro minuto» para facilitar a Fátima e aos seus fillos todo o que precisasen. POr último, apuntou que dende Servizos Sociais municipais, «estaremos pendentes de que dispoñan do necesario para garantir a súa total reintegración á vida das Neves».

Facebook
Twitter
WhatsApp
Email