O alcalde, Xosé Manuel Rodríguez Méndez, asinou xunto con outros 12 alcaldes e alcaldesas, un convenio coa Deputación de Pontevedra, para a posta en marcha do Servizo de Inspección de Residuos de empresas e negocios. Deste xeito, As Neves, contará con persoal funcionario provincial e subvencións económicas da Deputación para realizar o traballo de control do lixo, unha obriga para as administracións locais dende a aprobación da nova lei estatal de residuos o pasado mes de xuño.
11 funcionarios
O corpo de persoal inspector provincial estará formado por 11 funcionarios provinciais, que serán os encargados de identificar posibles incumprimentos e riscos ambientais asociados á actividade de negocios e empresas, mais en ningún caso en domicilios particulares.
Deberán realizar exames e controis periódicos, incluso realizando gravacións de imaxes, para levantar actas que poderán dar lugar a expedientes sancionadores.
Dende principios de 2023
A intención é que o corpo provincial de inspección comece a traballar entre os meses de febreiro e marzo de 2023, realizando labores informativas, no inicio, explicando a obriga de separar en orixe as diferentes fraccións de residuos –nomeadamente a parte orgánica- e de responsabilizarse do seu tratamento.
Posteriormente o corpo de inspección funcionará “con toda a súa eficiencia”, podendo tamén dispoñer sancións no caso de incumprimentos. Segundo subliñou o vicepresidente da Deputación César Mosquera, “non se pretende estar detrás de todo o mundo para sancionar”, senón que o principal traballo será convencer da necesidade da reciclaxe, un traballo que, segundo asume, “será lento pero sistemático”.
A presidenta, Carmela Silva, aplaudiu aos gobernos locais por sumarse “a tantos proxectos de transformación do territorio cun compromiso con outro modelo de provincia que nos está a referenciar”, como xa ocorreu co Revitaliza, o modelo de mobilidade e as apostas pola cultura e a igualdade.