O pasado luns pechouse a zona de venta de pescado do Mercado Municipal para realizar uns traballos de mellora, que estaba previsto que durasen dúas semanas. A día de hoxe xa están rematados.
Estas obras, ás que o Concello destiñou preto de 30.000 euros, eran indispensábeis para adaptar o Mercado das Neves ás normas hixiénico-sanitarias ditadas pola Xunta de Galicia en relación cos mercados de abastos.
Nestes días, retirouse o chan para colocar outro novo; fixéronse traballos de albanelaría na parede da parte posterior; reformouse a zona de almacenaxe, levouse a cabo a reparación dos azulexos, pintado, e substituiuse a porta por unha nova.
O Concello mantén o prezo dos postos: 20 euros ao mes
Antes do comezo das obras, o alcalde reuniuse coas e cos profesionais aos que máis afectaba este período de obras que, finalmente só impediron que vendesen un día no Mercado e non dous, como estaba previsto nun principio.
Ademáis, Xosé Manuel Rodríguez transmitiulles que o Concello manterá este ano o prezo da concesión, de 20 euros ao mes, que están a pagar polo uso do posto na praza de abastos, un alugueiro que inclúe luz, auga, limpeza e, dende hoxe un espazo renovado.