Cruceiro da Capela de San Sebastián
Vémolo á beira desta capela do lugar da Moreira. Cóbrese por un capitel de catro lados algo curvos e cilíndrico por abaixo, que presentan cabeciñas de anxo nas partes centrais afastadas por volutas. Serve de apoio a unha cruz rectangular coas arestas rebaixadas e os extremos rematados en cadrados. Presenta un Cristo pegado ao madeiro, baixo carteleira de INRI, coa cabeza inclinada cara á dereita. Os dedos amósanse pechados arredor dos cravos, salvo os da man dereita, que presenta dous deles estendidos en actitude de bendicir. Pano de pureza anoado á esquerda, e pé dereito cubrindo o esquerdo. Por detrás hai unha Virxe de pé, sobre pousadoiro de cabeciña de anxo co meniño Xesús no colo.
