Cruceiro de Covalagarto
Tamén chamado Cruceiro das Bugalleiras.
Ergueuse no ano 1859 sobre unha vara cilíndrica e lisa cuberta por un capitel de catro lados curvos con tres cabeciñas e unha caveira nas partes centrais aos pés do Santo Cristo. O capitel é de forma esferoidal, aínda que na parte alta aparece o astrágalo cos catro lados e na inferior vese o hemisferio co seu ecuador marcado. Soporta unha cruz rectangular que amosa figuras por ambas caras. No anverso, baixo a cartela do INRI, podemos ver a imaxe dun Cristo pegado ao madeiro, coa cabeza inclinada cara á dereita e as mans pechadas. Polo reverso hai unha imaxe pequena da Virxe María coroada, co meniño Xesús no brazo dereito no canto do esquerdo, que resulta máis habitual.
