Cruceiro das Barreiras
Vémolo dentro do Eido do Neto, pero á beira do camiño. Presenta como alicerce único unha base cúbica na que se finca unha vara rectangular nos seus inicios e despois coas arestas rebaixadas que se une directamente sen capitel a unha cruz latina cos ángulos en chafrán e acabados os extremos en cadrado, que carece de imaxes e adobíos.
Cóntase que a cruz levantárona os soldados franceses durante a invasión napoleónica que tivo lugar entre 1808 e 1814, pois alí seica morrera un deles. Con todo, unha inscrición do traveseiro, onde figura o ano de 1691, parece desmentir esta lenda.
